أكرم الصوراني - النجاح الإخباري - أكثر ما يثير استفزازي سؤال كيف حالك ؟ ليس لاني غزّاوي –والعياذ بالله- بقدر غضب حالي من حالي خاصة واني زعلان منها ومن فترة طويله بنحكيش مع بعض وجدياً أفكر حالياً بسحب قرض وشراء راحة بالي وفتح مشروع خاص لكن محتار أبيع ترمس ولاّ درة مشويّه ويبدو بعد تفكير عميق قررت أبيع الناس وطنيّه  .
حالياً مش كاتب ومش شاعر بحاجه ولو الفيس سألني بِمَ تُفكّر راح أحكيلوا مزاجي مِتعَكِّر وراح ألحس كلامي وأجيب إبرة وخيط وأخيّط شفايفي وأحبس لساني وأعمل لتمّي زر احتياطي ولو فكرت أكتب راح أكتب كلام فاضي ، ومش نازل ولا طالع بأيّ فعاليات أو ندوات أو مؤتمرات مع أنها مفيدة وأفيد ما فيها "وجبة الغدا" ، ومش كاتب اسمك يا بلادي عَ الشمس اللي بتغيب وراح أخلّي تفكيري مُغّيط وأصير مجغجِغ لا ناشف ولا مبلول ولامُبالي وراح أخليني في حالي وأعمل لدماغي يوزر نيم والباسورد (وأنا مالي) وأتحوّل عند اللزوم لكائن هُلامي وامسح جوخ وأوزّع ابتسامات صفرا ع البارد وع الحامي . 
من يوم وطالع راح أمشي الحيط وأصاحب الحيط وأعمل فيها أهبل لا شايل السلّم بالعرض ولا عامل فيها عنتر وكما لم يقول الشاعر : ضاقت فلمّا استحكمت حلقاتها يفضح عرضها صارت فيـزون  !